РУССКАЯ  ПРАВОСЛАВНАЯ  ЦЕРКОВЬ

МОСКОВСКОГО ПАТРИАРХАТA

ПРАВОСЛАВНЫЙ

ХРИСТИАНСКИЙ  ПРИХОД

СВ.  ИОАННА КРОНШТАДТСКОГО

КАСТРОВИЛЛАРИ

19 Agosto

Trasfigurazione di N.S.G.S.

Преображение Господа Бога и Спаса нашего Иисуса Христа.

Антифоны:

Антифон 1

Воскликните Господеви вся земля, пойте же Имени Его, дадите славу хвале Его. Молитвами Богородицы, Спасе, спаси нас.

Глас грома Твоего в колеси, осветиша молния Твоя вселенную, подвижеся и трепетна бысть земля. Молитвами Богородицы, Спасе, спаси нас.

Во исповедание и в велелепоту облеклся еси, одеяйся светом яко ризою. Молитвами Богородицы, Спасе, спаси нас.

Слава Отцу, и Сыну, и Святому Духу.

И ныне и присно и во веки веков. Аминь.

Молитвами Богородицы, Спасе, спаси нас.

Антифон 2

Горы Сионския, ребра северова, град Царя Великаго. Спаси ны, Сыне Божий, Преобразивыйся на горе, поющия Ти: аллилуиа.

И введе я в гору святыни своея, гору сию, юже стяжа десница Его. Спаси ны, Сыне Божий, Преобразивыйся на горе, поющия Ти: аллилуиа.

Гору Сионю, юже возлюби, и созда яко единорога святилище Свое. Спаси ны, Сыне Божий, Преобразивыйся на горе, поющия Ти: аллилуиа.

Слава Отцу, и Сыну, и Святому Духу.

И ныне и присно и во веки веков. Аминь.

Единородный Сыне, и Слове Божий, безсмертен Сый, и изволивый спасения нашего ради воплотиться от святыя Богородицы и Приснодевы Марии, непреложно вочеловечивыйся, распныйся же Христе Боже, смертию смерть поправ, Един сый Святыя Троицы, спрославляемый Отцу и Святому Духу, спаси нас.

 Антифон 3

Надеющиися на Господа, яко гора Сион, не подвижится во век. Преобразился еси на горе, Христе Боже, показавый учеником Твоим славу Твою, якоже можаху: да возсияет и нам грешным свет Твой присносущный, молитвами Богородицы. Светодавче, слава Тебе.

Горы окрест Его, и Господь окрест людей Своих, от ныне и до века. Преобразился еси на горе, Христе Боже, показавый учеником Твоим славу Твою, якоже можаху: да возсияет и нам грешным свет Твой присносущный, молитвами Богородицы. Светодавче, слава Тебе.

Господи, кто обитает в жилищи Твоем? Или кто вселится во святую гору Твою? Преобразился еси на горе, Христе Боже, показавый учеником Твоим славу Твою, якоже можаху: да возсияет и нам грешным свет Твой присносущный, молитвами Богородицы. Светодавче, слава Тебе.

Кто взыдет на гору Господню? Или кто станет на месте святем Его? Преобразился еси на горе, Христе Боже, показавый учеником Твоим славу Твою, якоже можаху: да возсияет и нам грешным свет Твой присносущный, молитвами Богородицы. Светодавче, слава Тебе.

Tropari:

Преобразился еси на горе, Христе Боже, показавый учеником Твоим славу Твою, якоже можаху, да возсияет и нам, грешным, свет Твой присносущный молитвами Богородицы, Светодавче, слава Тебе.

Слава Отцу, и Сыну, и Святому Духу.

Православныя веры поборниче, земли Российския печальниче, пастырем правило и образе верным, покаяния и жизни во Христе проповедниче, Божественных Таин благоговейный служителю и дерзновенный о людех молитвенниче, отче праведный Иоанне, целителю и предивный чудотворче, граду Кронштадту похвало и Церкве нашея украшение, моли Всеблагаго Бога умирити мир и спасти души наша.

И ныне и присно и во веки веков. Аминь.

На горе преобразился еси, и якоже вмещаху ученицы Твои, славу Твою, Христе Боже, видеша, да егда Тя узрят распинаема, страдание убо уразумеют вольное, мiрови же проповедят, яко ты еси воистинну Отчее сияние.